鐵甲威龍暴絡隔

星期二, 7月 31, 2007

NIKE兄, BYE BYE....

最近網上其中一個最HIT0既話題就相信都係「NIKE引退事件」。

一個香港人可以在短短3-4年間風靡中、港、台、日四地網民, 當中一定付出過不足為外人道0既努力。NIKE兄, 一直以來辛苦啦, 先好好休息一下啦。

星期一, 7月 30, 2007

六合彩

唔經唔覺出黎做野已經有8年,雖然0係正職同秘魯層面上一直都勉強叫做勤力,但係心中希望一朝暴發、提早退休0既果團火就從來未曾熄滅過。對我黎講賭馬賭波都太花時間去研究,所以只好勤D買六合彩。
聽日有個暑期金多寶,成3,300萬,為免聽日同人迫,所以今日放工就拿拿臨去買左一張電腦飛一張七個字(盛惠55蚊),跟手又問左個笑容滿面0既馬會姐姐攞左張幾得意0既資料:

正如「你娘親係女性」0既道理, 係人都知買齊49個字就必中, 但係原來買齊49個字要成6千幾近7千萬, 比你中左都「功不補患」。如果你心有靈犀認為有幾個冧巴係一定會抽到0既話, 你可以考慮買膽拖, 咁就唔駛咁多$。(當然呢句都係廢話)

六合彩官方網頁: http://bet.hkjc.com/marksix/

TERE師兄好介紹 -- TRANSPORTER (1)

尋晚臨訓先CHECK EMAIL, 收到TERE師兄醒左段好正好正0既CLIP比我:

而家0既香港係咪冇人才我唔敢講, 但係呢類鬼才就肯定有好多。

星期三, 7月 25, 2007

今朝0係SKYPE同個比較年青0既日本客人傾野, 途中透過個WEBCAM SHOW左兩個顏色版比佢睇, 佢分別用左兩個日本Young Gag黎講出左佢對果兩隻色0既睇法:
佢睇到第一隻色就講左句:「アメリカのお母さん」
對住第二隻色就講左句:「日光の手前」....

我最初聽到簡直就一頭霧水, 跟住佢又問我明唔明, 我梗係唔明啦!!之後再要佢解釋一下, 原來答案就係:
「アメリカのお母さん」-- まあまあ(MAMA)
「日光の手前」-- いまいち
(出處: http://blog.goo.ne.jp/negi8931/e/86eb5508c75f124ba73551d42b5bb570 )

原來日文都有呢d歇後語...

星期二, 7月 24, 2007

差d唔記得佢地唱過歌TIM....

當年一句引人遐想0既「交出你的, 張開我的」(當時血氣方剛o既我已經即時遐想左)..., 由一頭赤裸羔羊唱出, 一度成為城中話題（其實我覺得「赤裸羔羊」同「赤裸凌遲」呢兩個TERM都好鬼冗贅，試問有邊隻羔羊係會著衫？唔赤裸又點凌遲呀？）

熱愛 Can't Let You Go：當年同音樂鬼才林吻沖打得火熱0既美鳳，都曾經踏過一隻腳入樂壇，好彩最後亦及時抽返隻腳出黎。

本來佢都有本錢可以走學生情人0既路線，亦係0係飛圖比較叫做發過圍0既少壯派，可惜時不與佢。

果位男生相信已經轉左行．．．

星期一, 7月 23, 2007

鐵人28

鐵人28其實有幾個特點:
1/ 硬橋硬馬隻揪隻: 除左雙手雙腳同埋識飛之外, 佢根本就無咩野武器, 更加唔好講乜野飛彈死光之類啦。每次就係同人格鬥。
2/ 時忠時奸: 好似主題曲中都有提及, 鐵人28只係會聽拎住個REMOTE CONTROL果個人支笛, 所以如果個有壞人老ROB左個REMOTE CONTROL, 鐵人28就會變成壞蛋機械人。正所謂「ある時は正義の味方　ある時は悪魔の手先」...唔錯, 勝在夠REAL, 夠老實
3/長命。請看下面0既內容:

黑白60年代版 (固力果特約) -- 唔知香港有冇播過

而家睇返D劇情, 當然係得啖笑啦!! (尤其是壞人果句敬語:「われわれはこの鉄人28号をしばらくお借りします」)

真人黑白電影版

自稱為「太陽使者」0既80年代版 -- 金錢台播過
日文原裝OP

金錢台主題曲 (唔知係首曲本身夠激昂, 定係唱歌0係楊頌恩有料到, 成首歌聽落都OK)
http://hgpa.net/php/viewthread.php?tid=135&extra=page%3D5

金田正太郎變0左老豆,由佢個仔金田正人擔正0既90年代「FX」版 -- TVB播過

金田正太郎變番豆丁0既復古千禧年代版 -- TVB剛剛播完
http://www.tetsujin28.tv/top.html

電視版

同系列電影版 (白昼の残月) -- 2007

第二次0既真人電影版 -- 2005

由1960至2007仲未完．．．．一句講哂: 「橋唔怕舊，最緊要受！！」

星期日, 7月 22, 2007

新英雄登場!!

最近走在香港街頭, 好容易會見到一個新HERO, 佢個名叫「勃勃超人」:

正當我諗極都唔明點解要搵喬先生飾演呢位超人之際, 黃老邪一句「印度神油」(http://zh.wikipedia.org/wiki/%E5%8D%B0%E5%BA%A6%E7%A5%9E%E6%B2%B9)就令我茅塞頓開。不過我硬係覺得超人下體好似塞住一支硬物, 睇落去唔係咁自然....

我覺得成個廣告有一個令人費解0既問題, 就係廣告裡面已經假設0左喬寶寶某方面0既能力係好勁果隻, 食左呢隻藥就可以得到接近甚至超越喬寶寶0既全新力量....相反同一款產品0既另一個廣告就拍得含蓄得多啦...

http://www.laismedicine/files/bubuso.wmv

其實有時出差返大陸睇電視, 一到0左深夜時分都會出現大量咩咩壯陽或者咩咩醫陽萎0既廣告雜誌,最攞膽0既一招就係搵D女人做枚扮果d事主0既老婆, 0係個樣無打格仔同聲音無處理0既情況下, 對住鏡頭猛咁講佢老公未食隻藥之前有幾咁唔掂, 食0左藥之後又有幾咁BANG BANG聲...如果D老公知道佢老婆當住十幾億人前面咁樣數落自己, 可能會出現連環倫常血案都唔定....而我對呢個廣告之所以咁有印象, 係因為大陸個電視台果晚竟然用呢個廣告雜誌不斷重播再重播, 夾生腰斬左我之前已經睇左個幾鐘0既Nadal vs Federer溫布頓決賽....(場波之後都冇再播返....)

星期三, 7月 04, 2007

桜坂（SPECIAL LIVE VERSION）

無鬼聊聊上YOUTUBE, 本來諗住搵0下有冇「いつかまた逢える」0既OP睇0下(因為忽然間有D掛住福山), 結果失望而回,反而誤打誤撞搵到個「桜坂」0既CLIP。本來搵上YOUTUBE用「福山雅治」黎search, 出到「桜坂」0既LIVE版係一D都唔出奇0既事,但呢個桜坂（SPECIAL LIVE VERSION）真係確實非常之有驚喜:

桜坂作詞：福山雅治作曲：福山雅治

君よずっと幸せに　風にそっと歌うよ
愛は今も愛のままで
揺れる木漏れ日　香る桜坂
悲しみに似た　薄紅色
君がいた　恋をしていた
君じゃなきゃダメなのに
一つになれず
愛と知っていたのに　春はやってくるのに
夢は今も　夢のままで
頬にくちづけ　染まる桜坂
抱きしめたい気持ちでいっぱいだった
この街で　ずっと２人で
無邪気すぎた約束
涙に変わる
君と知っていたのに　花はそっと咲くのに
君は今も君のままで
逢えないけど　季節はかわるけど
愛しき人
君だけがわかってくれた
憧れ追いかけて　僕は生きるよ
愛と知っていたのに　春はやってくるのに
夢は今も　夢のままで
君よずっと幸せに　風にそっとうたうよ
愛は今も　愛のままで

如果想聽呢位仁兄0既其他作品又或者想起一起佢個底, 可以去 http://www.youtube.com/user/nbcsaku

講起福山, 我最有印象梗係「同一屋簷下」0既超型仔二佬雅也啦, 之後就有「いつかまた逢える」, 再跟住應該就係我留學果年追睇0既「めぐり逢い」...更難得0既係佢出道咁耐,到依家依然保持到一定0既人氣, 証明佢係有一定實力0既。請繼續加油啊, 福山さん！！

福山雅治:
http://ja.wikipedia.org/wiki/%E7%A6%8F%E5%B1%B1%E9%9B%85%E6%B2%BB

「いつかまた逢える」：　
http://ja.wikipedia.org/wiki/%E3%81%84%E3%81%A4%E3%81%8B%E3%81%BE%E3%81%9F%E9%80%A2%E3%81%88%E3%82%8B

星期三, 6月 20, 2007

香港再次回到日治時期

有一日放工行過尖沙咀清真寺對面0既巴士站，無意間見到一塊廣告燈箱，上面寫住D不很之所謂0既0野，本來都打算掂行掂過就算，不過離開左10米到始終到頂唔順，決定行返轉頭，拔出腰間0既相機影低佢比各位睇0下：

　

好心D人啦，日字港用本身已經唔係100%正當0既做法，今次仲離譜到「鑒粗」將D中文字用平假名標出0黎，真係想問下諗呢條橋出黎0既人打算將呢D平假名俾邊個睇?未學過日文0既人自然唔知佢UP乜；識日文0既人自然會鄙視佢；我相信最可能「LAI（請用廣東話第2聲讀出）0野」就係果D識得少少日文0既人，如果佢地去到日本，好可能會同D售貨員猛咁講「しゅうもこう」、「しゅうもこう」.....（最大鑊都係最後就算將「しゅうもこう」0既「漢字」寫出黎，D日本人都唔會知佢UP乜Q 0野）

星期六, 6月 16, 2007

費達拿0既10球靚波

講多無謂, 去片!!!

星期日, 6月 03, 2007

再上機...

經過左長達半個多月0既閉關奮戰, 終於「及時」將手上「山のようにたまっていた」0既翻譯工作清左, 聽日總算可以用輕鬆0既心情去日本出差一星期。話時話呢半個月真係好難捱, 本來日抖應付正職, 一放工再對秘魯開戰呢種PATTERN對我0黎講已經唔係新聞,但係今次最攞命0既就係失驚無神要去大陸出差2、3日, 完全upset哂我個schedule, 到左今個星期尾心情真係好緊張, 好彩最後0既一輪衝刺總算冇跌WATT，總算0係尋晚完成任務，仲SPARE0左個星期日出黎抖抖添。
順帶一提，呢兩個星期最好0既娛樂就梗係睇法國公開賽啦,直播0既時間都算OK架！！（星期日既10點仲有精華重播添）

星期四, 5月 03, 2007

千呼萬喚始出來

唔好意思, 要各位久等啦:

新一輯「白花MV」中依然有穩膽、即係擔任白花油業務拓展經理0既光光、而嘉麗都健在，唯獨唔見左瑩瑩．．．Stephen0係MV裡面大玩特別敲撃樂器，又伙拍福仔與一眾童男童女化身成傳遞歡笑同力量0既「愛的精靈」，不過個人認為此作0既可觀性不及上年的「夢想有你」．．．

星期二, 4月 10, 2007

10天健康波幅圖（續）

本來以為發完燒，扁桃線發完炎就萬事皆休啦，點知又到隻耳仔出事。今次真係名副其實0既「周圍有事」囉．．．
話說上星期有一晚沖完涼，覺得有D水走0左入隻右耳裡面，於是盡一切方法（包括用棉花捧「採礦」、單腳跳等）希望整返篤水出0黎，可惜一D都唔成功。之後就一直覺得有篤水0係隻耳仔度"LONG"0下"LONG"0下，直立0個陣篤水就塞住隻耳，但一打斜個身篤水就碌0左去第二度，隻耳仔又會清返。不過既然平時生活身體都以直立為主，所以我亦一直被「耳塞」問題困擾。
估唔到今朝起身，竟然感覺到右耳中0既水浸到滿一滿，連之前果幾日"LONG"0下"LONG"0下0既情形都冇，無論個身打直或者打斜右耳都全面擠塞（不過唔係失聰。其實仲聽到0野，不過係濛少少0者），就覺得好奇怪：「冇理由D水會越0黎越多架」於是就決定返工去搵個專科醫生睇0下，希望佢用D專用設備吸入耳仔裡面果篤咁擾人0既水。
結果醫生同我講，我耳仔裡面D水唔係外來水，而係由裡面谷入隻耳度。何解呢？原來係之前0既感冒菌入0左耳，導致中耳發炎積水。所以醫生比左D藥幫我打死埋D感冒菌死剩種之外，又要我滴鼻藥水。（我冇寫錯，係滴鼻，因為醫生解釋我知中耳同外耳之間有耳膜隔開，要醫就要從鼻入藥，因為D藥冇可能由耳窿入到中耳）
早知係咁就一早睇醫生啦，成個禮拜左跳跳右跳跳都唔知為乜．．．

星期四, 4月 05, 2007

10天健康波幅圖

回首自己過去10日0既健康情況真係可以用「差到無倫」0黎形容，加上正職同秘魯又一樣咁忙，連日休息不足令病情多日都係0係低位反覆徘徊：

27/MAR: 上晝返工至放工一直好好地，臨放工仲約0左小C去海典灣打波。點知0係返屋企程火車唔知係咪撞邪，成個人忽然間頭重重好唔舒服，不過當時只係諗最多打完波出身汗，再早D訓就應該會冇事，所以明知0係屋企食完夜晚飯出發去海典灣果陣明明已經覺得成個人好慶都冇理佢。結果果晚打（捱）完場兩個鐘之後覺得全身冒煙、關節酸軟，即刻衝出去睇康健夜診。原來已經燒成38度幾，入到去見到醫生馬上要求打針同埋比特效抗生素（以上兩點都係我主動要求），醫生可能見我咁死，再三叮囑我食哂D藥要去覆診。
醫療費：28.00（公司醫療保險診金）+40.00（特效藥）+20.00（打針）= 88.00

28/MAR: 經過一晚休息已經退左燒，但係之前果晚燒得火熱0既手腳關節仍然超級酸軟，加上事先已知道28號冇日本人0係公司，所以「乘亂」攞左1日假，訓足一日之後感冒情況緩慢好轉。

29/MAR: 戴口罩返工，渾渾噩噩0係公司過左一日。當晚做秘魯。

30/MAR: 出差返左一日大陸（返大陸唔敢戴口罩，驚俾人捉去隔離同研究），同埋廠家成棚人出去食晏，當然冇得戒口，加上覆診0既藥食哂，覺得自己應該要好返，0係一時鬆懈之下甜、酸、辣、蒸、炒、炸樣樣食勻；當晚仲約大哥0係萬象城食和民，之後就返香港，去康健覆診，但果晚已經唔係27號睇我果個醫生。
醫療費：28.00（公司醫療保險診金）+40.00（特效藥）= 68.00
果陣只係覺得有喉嚨仲有D頂住頂住同有D咳，但我堅持呢D係康復0既過程之一，於下決心食埋呢次藥就算，要靠自己0既抵抗力"NGAU"（請以廣東話第3聲讀出）好佢。

31/MAR: 懶洋洋0係屋企過0左一日，喉嚨仲有D頂住頂住、有D咳、開始失聲。當晚開始趕秘魯。

01/APR: 去左海典灣同曉峰打網球，失聲。（全程戴住口罩。當中大哥曾經以有損儀容為理由要求我除口罩），當晚做秘魯。

02/APR: 戴口罩返工。秘魯方面開始全面進入「全開狀態」(即1900返屋企先訓2-3個鐘，最遲2200起身食晚飯，2300全力衝刺，最遲0400訓覺)，埋下復發的禍根。

03/APR: 一朝起身消失0左兩日都唔夠0既喉嚨痛又返番0黎我身邊，心知不妙。返工全日戴口罩，又食左幾匙川貝琵琶露。放工0係火車一時諗唔開，竟然決心要唔戒口，強行令唔聽話0既喉嚨屈服，於是0係大圍火車站前0既「小蜜蜂」又食牛什又食豬紅翅，秘魯方面又連續第二日進入「全開狀態」，喉嚨當晚（應該話係兒童節0既凌晨）決定全面叛變！

04/APR: 竟然喉嚨痛痛到醒左（竟然比平時早0左半個鐘起身），戴口罩返工，返公司前買左盒使立消喉糖，仲每個鐘"PAK"（請以廣東話第1聲讀出）1粒試圖安撫喉嚨重災區，可惜完全無效！無論食野同飲水都好痛，總算知道咩叫做「食不下咽」。放工後以最高速度返秦石搵「最強幫手」蔡醫生幫手，結果被診斷出原來我唔係出普通喉嚨痛，而係「慢性扁桃腺發炎」，醫生仲建議我開刀切左個扁桃腺佢，費事佢成日玩發炎。醫生開左一個星期份量0既藥比我（其實只有2隻藥），叫我一星期後覆診。
醫療費：300.00

05/APR: 「訓覺．飲水．撒尿」呢3個不斷循環0既動作就貫穿0左我4月4號晚同今日大半日0既生活。醫生D藥果然夠堅，雖然只得兩種藥，但配合果3種動作，今日我扁桃腺0既腫痛已經接近完全消失。

總括0黎講，呢10日0既我真係被病魔折磨得太死，希望我可以好好利用呢個「復活節假」0黎完成復活啦！！

星期一, 3月 26, 2007

新書包

大概一年前0係時代廣場0既tumi專門店第一次見到T3 Ducati Balance Backpack,登時被佢0既流線型設計深深吸引，只係當時0既價錢實在太貴,所以幾中意都冇計...一年後0係銅鑼灣崇光tumi專櫃再度重遇佢,發覺自己對佢仲未忘情之餘,又發現平左DD, 0係官網度Register左之後仲有3年保養, 所以最後就0係狗年0既年廿九帶左佢返屋企。

　↑　黑+紅0既配搭帶來唔錯0既觀感。黑色跣水尼龍料、紅色0既PVC料同埋特別設計0既拉鍊配合,起到一定程度0既防水效果。

　↑　TAG上寫住0既「hybrix nylon/polyester fabric」好似係TUMI0既專利質料，特點係耐磨損和耐污。（唔知落0係我手上又會有幾襟呢．．．）

　↑　整個bag間隔都算幾實用。最近背脊果格可以用黎裝電腦、火牛、雜誌；大格裝飯盒、電包、銀包、psp、水壺；內格裝PDA；出面果格裝散紙、鎖匙等小東東。

　↑　出面果格裡面有一個幾特別0既磁石鎖匙扣。(磁力好強!!)

　↑　背脊同揹帶用0左軟綿綿、符合人體工學0既網狀護墊, 揹幾耐都唔會辛苦。(咦?好似賣緊「白色太陽鎗」廣告咁0既....)

而T3Ducati 同普通T3版就在於:
1. 跟左個Ducati扣

2. 0係bag0既兩邊寫住大大個Ducati

3. 兩邊個大pad位加上手抽位外層由尼龍換成紅色PVC

當然,任何BAG都會有佢0既缺點:
1. 我覺得都幾致命....就係佢個FLAP位太薄啦, 除非夾硬將個BAG塞到爆一爆, 由裡面撐起撐實個FLAP, 否則一揹上去個FLAP位就會夾生被拉到摺埋一住, 久而久之出現左一條核突0既摺痕....真係睇到都心痛

(模擬照片)
2. D拉鍊唔算太好拉

3. 佢兩條揹帶之間距離都幾長(接近20cm), 可能想就老外身形, 如果你個膊唔夠橫0既話隨時會「跌膊」

4. 右揹帶上個拉鍊格作用好似唔係咁大。(個售貨員話可以用黎放電話,我心諗「部電話都要好細0下先得喎」....)

不過整體上我對佢都好滿意, 相信有一排都唔駛買背囊LU....

P.S. 原來有好多日本人出差都會用TUMI 0既BAG, 睇黎TUMI 0係日本都幾有名。

LINKS:
TUMI介紹:(維基百科)

TUMI官網:

DUCATI介紹: (維基百科)

T3 Ducati Balance Backpack:

TUMICITY:(日本)

星期一, 3月 05, 2007

星期日, 2月 25, 2007

打網球

不經不覺,打0左網球已經有成3年幾...由以前去每個星期去小C度打兩日,直至馬鐵起好哂而家搬返去曾大屋打;由最初一場打成5、6個波出街,一散場要撲出去執,直至而家實行「打唔見一個波罰廿蚊」都一個月罰唔到好幾次...至今一直都仲未厭, 絕對可以話係繼羽毛球、踩單車、保齡球同長跑後最有恆心KEEP住做0既運動之一。鍾意打網球可能係因為覺得呢項運動好有個人風格,0係同一個規則下你可以用上不同的打法和戰術,你亦可以根據你唔同0既性格、技巧等以唔同0既職業網球員為學習目標, 0係集各家之大成(其實只係模仿)0既過程都係一種樂趣。

倒如我會希望學到片中Sebastien Grosjean咁0既超級靚西方式正手擊球:

發球方面當然要封洛迪克(Andy Roddick )做偶像啦:
(佢0既251km/h全地球最高發球速度紀錄好似仲未有人破到)
請集中留意片中06:50-06:08 0既發球分析,左邊0既洛迪克0係慢鏡下開個波都咁Q快,姿勢又靚絕,華實兼備,我問你怕未?

反手我最欣賞梗係瀟灑到震0既FEDERER啦:

片中01:05-00:26, 單手反手上旋球,動作似足「天翔龍閃」...駛唔駛咁型先?

我一定要好好以佢地為目標好好加油...一定要加油啊!!!

男子網球世界排名:
http://www.atptennis.com/5/en/rankings/entrysystem/

女子網球世界排名:
http://www.sonyericssonwtatour.com/2/rankings/singles_numeric.asp

OTHER LINKS:
1) 想睇清楚球手0既動作,不妨0係YOUTUBE用"球手名(英文)"<隔一個SPACE>"SLOW"0黎search就有好多野睇架啦
2) 老邪兄長個TENNIS CLUB: http://www.tennisbond.com/

星期一, 2月 19, 2007

終於等到佢0既新作啦！！

愛多80年　
作曲：馬永齡
填詞：阿秋
編曲、監製：馬永齡
主唱：顏福偉

合法下載：　http://www.whiteflower.com/PublishWebSite/whiteflower/gallery/98551a9c-a83f-4e32-9a1f-7fbce3a6311e.wma

每日穿上套裝　機器式工作
沉悶化妝　何解遮蓋你臉龐
盼做富豪主角　用來換你供車作樂
不過失眠亦　發作

請掛起晚裝　揮去金錶束縛
其實更多　難得感覺　由你發落
就似拍拖　無需高檔堂皇　只憑簡單釋放
令無味罐頭　也變糖

來簡約地　愛多八十年　態度未曾改變
昨日新款在明日膚淺
為何尚要　眷戀爭先
贏得仰望　奪去了感覺　快樂也是幻覺
情人為你選的花　你也未觀看

不要千呎家　不愛金光璀璨
寧願去揀　床舖簡潔　陳設雪白
就算世間　時興搶眼大話
堅持你的風格　
別人在笑嗎　懶理他

來簡約地　愛多八十年　態度未曾改變
昨日新款在明日膚淺
平凡像我　也於身邊
贏得仰望　奪去了感覺　快樂也是幻覺
情人為你選的花　你也未觀看

恆久　可以嗎　
要敵過時刻轉變歲月吧
試問有誰綻放一生　像雪花

日日　想得獎最後輸得鋪張
最簡單迴響　卻最響

來簡約地　愛多八十年
世事無常改變
昨日新款在明日膚淺
為何尚要眷戀爭先
如果世事　未再有新意
八十歲後遇見
唯獨白色的鮮花　會繼續優雅
平凡但顯赫的花　變化亦不怕

喜歡顏福偉0既「白花油」系列歌，主要係因為：
1. 佢一D都唔濫產，一年先一首，絕對算得上係千錘百鍊，襟聽過好多流行歌。好容易將佢同埋日本0既TUBE（90年代時呢隊日本POP BAND只會0係夏天先出碟）聯想埋一齊。

2. 顏生0既歌0既歌詞好多都勵志、健康、甚至警世。例如今次呢首「愛多80年」就係講現代人生活0係功利行頭、紙醉金迷0既世界裡面，容易變得極度貪新忘舊，迷失自我。歌者憑歌寄意，希望現代人能夠作出反思，明白平淡是福，古老0野都好有值得欣賞0既地方（值得欣賞0既當然包括創業自1927年，今年已經有80年歷史0既包括白花油啦！佢果句「唯獨白色的鮮花　會繼續優雅」HARD SELL得0黎不失含蓄）

3. 顏生0既唱功其實一D都唔差，激昂又有，假音都交足貨比你，你仲想點？

--> 如果呢D歌冇白花油背景、大家又唔會嫌STEPHEN唔夠靚仔，會唔會比較容易D接受到呢D歌呢？

「白花油」系列歌
1. 去飛(2004)（顏福偉、彭家麗）-- 曲詞都相當順耳0既一首合唱歌，希望有日可以有人同我0係K合唱到啦