唔知新咗幾多次嘅「新射鵰英雄傳」

又翻拍啦！！今次仲要係集中港台三路人馬添！去～片！！



個人覺得以下嘅選角好正：
最正梗係東邪啦：今次演東邪果位仁兄，我覺得佢個造型以至氣質絕對邪過哂之前D黃老邪（記住佢係東邪，唔係劍聖呀！！）

西毒：睇住佢由AV男優轉營做戇直中年男人再變諧星，今次再做奸角唔知會唔會奸唔出汁呢？好期待。

鐵木真：仲要由返做大陸版「成吉思汗」嘅巴森（佢本身係成吉思汗二仔察合台嘅後裔）黎做，我問你服未？

包惜弱：由當年嘅周芷若變成而家嘅包惜弱，不禁要歎句「歲月不饒人」，但亦好想知道佢會點做人老母。

歐陽克：係之前大陸版「笑傲」嘅林平之，都幾靚仔。

個人覺得以下嘅選角最冇變化：
北丐（之前個Trailer本來仲係孫興架，可能覺得佢都係唔夠老啦，所以先易角，但想唔到最後又係家仁哥）

南帝、老頑童：可能角色所限啦，一個字：「悶」

最後講返D主角：
郭靖：最唔鍾意佢，因為佢個樣太試正，又頭髮長長，似令狐沖多過郭靖。乜郭靖唔係黑黑實實，戇DOGDOG咁嘅咩？（最少都要好似鵬鵬咁啦）唔通又改咗版？

黃蓉：我完全唔識佢，只係聽過佢首「孤單北半球」，個樣都幾Q嘅，不過所有人都會用佢同翁美玲、朱茵、周迅、甚至米雪比較，要成功突圍恐怕唔係咁容易．．．

楊康：我好鍾意佢，因為佢夠哂靚仔。（至於葉榮添版同少年包青天版楊康，請容許我衷心講句：請收皮）

穆念慈：都係一個靚女（好過有線怪痰幾千倍啦）

CG特技同炸藥已經用到失哂控，所以對武打場面我唔會太過有期待。反而每一輯原來都對大漠射鵰一幕都好考究，而今次個動作都算幾有型！不過我就有個疑問：「企喺一匹起哂擒嘅馬上面，真係可以瞄得咁準？」

NIKE兄, BYE BYE....

最近網上其中一個最HIT0既話題就相信都係「NIKE引退事件」。



一個香港人可以在短短3-4年間風靡中、港、台、日四地網民, 當中一定付出過不足為外人道0既努力。NIKE兄, 一直以來辛苦啦, 先好好休息一下啦。

霍元甲在亞記!?

頭先睇電視, 先知道0係播哂「倚天屠龍記」之後, 亞記第n次重播甄子丹陳真版0既「精武門」, 雖然甄子丹D表情有時真係幾誇張, 但係睇佢打就非常賞心悅目, 快、狠、準!!
而今次呢個凌晨一點半至兩點半0既深夜時段重播劇更罕有0咁得到贊助者商冠名播出, 全名是「優之良品特約: 一代宗師霍元甲之精武門」(!?) 我見到睇個標題當堂呆0左....而家李連杰套「霍元甲」收得0者, 唔駛咁又拉埋霍元甲落水呀? 劇中主角根本就係陳真, 而唔係霍元甲, 一下子改成咁好誤導人0者....我寧願佢老老實實, 整個黃元申「大俠霍元甲」搭梁小龍「陳真」0既combo,可能仲夠經典, 仲多人會追0黎睇!!
不過如果各位真係想一睹「新精武門」中由高雄飾演0既霍元甲0既英姿和武功修為, 最好盡快開始追啦, 因為佢冇幾耐就會俾人毒死, 佢死個場仲會非常耽美0添.....啊, 仲可以睇到少女版戴夢夢(飾演陳真個妹小燕)0架!



碩果僅存0既劇情及人物介紹: http://myren.hp.infoseek.co.jp/donnie.htm

藝名

最近睇返日本樂隊GLAY0係上年3月舉行0既演唱會DVD，忽然間好想知道返隊中各人0既真名，於是就上網查啦，結果查到：

TERU: 小橋照彦
TAKURO:久保琢郎
JIRO：和山義仁
HISASHI：外村尚

既然戚起0左條根，就上網用0左食飯時間搵0左D日本同中港台藝人0既藝名同真名，同大家分享0下:

日本
松たか子　--　藤間隆子
倉木麻衣　--　青野真衣
椎名林檎　--　椎名裕美子
小雪　--　加藤小雪
AIKO　--　柳井愛子
早見優　--　井上和美
西城秀樹　--　木本龍雄
浅野忠信　--　佐藤忠信
真田広之　--　下澤広之
郷ひろみ　--　原武裕美
椎名桔平　--　岩城正剛
渡部篤郎　--　渡部篤
いしだ壱成　--　星川一星
瀬戸朝香　--　家田恵美
和久井映見　--　和久井良子
優香　--　岡部広子
松嶋菜々子　--　松嶋奈奈子
飯島愛　--　石井光子
黒木瞳　--　伊地知昭子
華原朋美 -- 下河原朋美
川本真琴 -- 川本和代

中港台
　男子組　－－　
　

　女子組　－－　



有D好似真名0既原來係藝名、有D人連自己個姓都改埋、有D人個真名甚至同其他明星個名一樣．．．認真係「真實假象，無色無相」．．．．

向無名英雄/雌致敬!!

係朋友劉力Send俾我0既,同大家分享0下啦:

http://princessdiane.com/oldies/tv-oldfriends-male90s.html
http://princessdiane.com/oldies/tv-oldfriends-male80s.html
http://princessdiane.com/oldies/tv-oldfriends-male70s.html
http://princessdiane.com/oldies/tv-oldfriends-male60s.html

http://princessdiane.com/oldies/tv-oldfriends-female90s.html
http://princessdiane.com/oldies/tv-oldfriends-female80s.html
http://princessdiane.com/oldies/tv-oldfriends-female70s.html

下次0係街度見到佢0地, 記住同佢0地打招呼0刺!! （當然有D仙遊0左０既朋友就梗係少見為妙啦．．．．）

無記無記．．．勞氣勞氣

0岩0岩先0係「隨時候命」欣賞過阿佘玩失憶，過0左3個鐘都冇0既「刑偵III」又話JESSIE失憶，連老公張大勇都唔認得．．．無記呀無記，兩套劇相隔成接近8年啦，點解D橋段仲咁雷同0架？唔通除0左失憶、兄弟為$或女反目、同婚外情就冇其他元素咩？
「刑偵III」D陣容雖然唔係太吸引我，但因為Melissa有份演出（呢套仲好似係佢第一套劇），我會盡量追睇落去．．．
廢嗡完畢，0訓覺

SPL

最近同大哥、Smallsze去0左睇殺破狼。整體上觀感ok,打得夠哂勁秋,0岩哂我呢d唔鍾意用腦0既人。雖說呢套片因為太暴力而被定為三級片, 但其實從香港人0既角度睇都唔算認真好暴力。個人覺得最好睇有兩幕: 首先係第一個警察被阿JACK(吳京)以接近「八稚女」的手法用小太刀喪片後再割喉,一命嗚呼; 另一幕就係馬軍(甄子丹)和阿JACK的窄巷死鬥,兩人都有武功底子, 動作既快且狠,打得非常好睇。至於劇情方面就冇乜特別, 沒有值得談論的地方, 感覺上就係要營造一個又一個殺人、隻揪的場景。
其實呢套片我最想睇0既唔係甄子丹、亦唔係洪金寶（洪金寶做黑幫大佬個樣唔夠奸）同任達華, 而係吳京。總覺得華籍武打新星要令人留下深刻印象通常就係做奸角。(李連杰個樣忠到接近有D戇居,0係轟天砲4都要做冷面殺手....), 吳京來頭其實好勁, 細細個就習武, 連續幾年攞過甚麼甚麼武術冠軍, 更加曾經係國家武術隊的成員,個人非常期待佢0既發圍。
講開甄子丹, 除0左佢套「精武門」之外, 有冇人知道佢早期有齣戲叫「情逢敵手」?我有一次由大陸搭巴士返沙田果陣0係車度睇過, 非常搞野。 搞野不在於劇情, 而係甄子丹當時０個個樣同表情真係.... 如果有人行街見到呢隻碟，唔該幫我買隻。（廿蚊應該實有找）

殺破狼官方網頁： http://www.shapolangthemovie.com/
其中一個介紹吳京0既網頁: http://wujing.sky263.com/gonggao/gonggao.htm