唔知新咗幾多次嘅「新射鵰英雄傳」

又翻拍啦！！今次仲要係集中港台三路人馬添！去～片！！



個人覺得以下嘅選角好正：
最正梗係東邪啦：今次演東邪果位仁兄，我覺得佢個造型以至氣質絕對邪過哂之前D黃老邪（記住佢係東邪，唔係劍聖呀！！）

西毒：睇住佢由AV男優轉營做戇直中年男人再變諧星，今次再做奸角唔知會唔會奸唔出汁呢？好期待。

鐵木真：仲要由返做大陸版「成吉思汗」嘅巴森（佢本身係成吉思汗二仔察合台嘅後裔）黎做，我問你服未？

包惜弱：由當年嘅周芷若變成而家嘅包惜弱，不禁要歎句「歲月不饒人」，但亦好想知道佢會點做人老母。

歐陽克：係之前大陸版「笑傲」嘅林平之，都幾靚仔。

個人覺得以下嘅選角最冇變化：
北丐（之前個Trailer本來仲係孫興架，可能覺得佢都係唔夠老啦，所以先易角，但想唔到最後又係家仁哥）

南帝、老頑童：可能角色所限啦，一個字：「悶」

最後講返D主角：
郭靖：最唔鍾意佢，因為佢個樣太試正，又頭髮長長，似令狐沖多過郭靖。乜郭靖唔係黑黑實實，戇DOGDOG咁嘅咩？（最少都要好似鵬鵬咁啦）唔通又改咗版？

黃蓉：我完全唔識佢，只係聽過佢首「孤單北半球」，個樣都幾Q嘅，不過所有人都會用佢同翁美玲、朱茵、周迅、甚至米雪比較，要成功突圍恐怕唔係咁容易．．．

楊康：我好鍾意佢，因為佢夠哂靚仔。（至於葉榮添版同少年包青天版楊康，請容許我衷心講句：請收皮）

穆念慈：都係一個靚女（好過有線怪痰幾千倍啦）

CG特技同炸藥已經用到失哂控，所以對武打場面我唔會太過有期待。反而每一輯原來都對大漠射鵰一幕都好考究，而今次個動作都算幾有型！不過我就有個疑問：「企喺一匹起哂擒嘅馬上面，真係可以瞄得咁準？」