怪風帕布

並唔係因為香港好耐冇打過風所以先覺得佢怪，而係佢真係幾怪：

係威係勢掠過台灣南部之後，布布繼續浩浩蕩蕩咁吹向香港。而我亦首次覺得我0既工作原來可以同天氣咁有關係。原因係我上星期三同四都要去台灣出差，星期二果日0係大陸出差，睇住布布吹緊台灣，真係好擔心第二日唔可以成行；之後去到台灣，又睇住佢對實香港0黎吹，又要開始驚星期四返唔返到香港；當我知道全部最後都係虛驚一場之後，就開始覺得呢隻帕布真係「睇得唔打得」．．．星期五一起身抱住「睇吓你死咗未」０既心態上天文台網址睇吓佢咩情況，點知佢唔單止未死，仲一個屈尾十打個8字吹返轉頭，你話怪唔怪？

但到我上晝開工果陣我仍然堅持布布已經係「強弩之末」，搞唔出咩花樣，點知一食完飯劇情急轉直下，從同事們口中開始不斷聽到「好快掛3號啦」、「好似會打到8號喎」、「講左3點半打8號啦」，最後原來14:30打8號。公司0既日本人老細本來仲未知發生緊咩事，後來見到公司唔知幾時開始瀰漫住一片超級緊張0既氣氛同埋有超多電話（相信有D係報料電話），最後從會計姐姐口中知道就黎打8號，就唯有無可奈何咁宣布一打8號就全世界走得。老細可能對我地咁有默契咁準備走人嘅行徑有D不滿，於是又爆左一句：「日本ではそんな風は絶対休みならない！香港はあまい！！」

順帶一提又有一個叫「聖帕」0既颱風（記住帕布只係強烈熱帶風暴，但聖帕係真真正正嘅「颱風」）又嚟緊啦，睇吓今次又點啦！

最後要講嘅係，我把引以為傲嘅梁蘇記長遮終於喺布布嘅強攻下受到重創（遮頭飛脫），最後要攞去整．．．慘！

LINKS:
1/ 香港天文台熱帶氣旋位置及路徑圖
2/ 成堆風名，仲勁過D族譜！！！　
　（香港改D名真係非常咁「香港」！如果我冇睇錯，呢D名應該係由上而下，由左至右逐個
　逐個咁用緊．．．大家不妨聽一聽D名，可以學外語！）