10天健康波幅圖 （續）

本來以為發完燒，扁桃線發完炎就萬事皆休啦，點知又到隻耳仔出事。今次真係名副其實0既「周圍有事」囉．．．
話說上星期有一晚沖完涼，覺得有D水走0左入隻右耳裡面，於是盡一切方法（包括用棉花捧「採礦」、單腳跳等）希望整返篤水出0黎，可惜一D都唔成功。之後就一直覺得有篤水0係隻耳仔度"LONG"0下"LONG"0下，直立0個陣篤水就塞住隻耳，但一打斜個身篤水就碌0左去第二度，隻耳仔又會清返。不過既然平時生活身體都以直立為主，所以我亦一直被「耳塞」問題困擾。
估唔到今朝起身，竟然感覺到右耳中0既水浸到滿一滿，連之前果幾日"LONG"0下"LONG"0下0既情形都冇，無論個身打直或者打斜右耳都全面擠塞（不過唔係失聰。其實仲聽到0野，不過係濛少少0者），就覺得好奇怪：「冇理由D水會越0黎越多架」於是就決定返工去搵個專科醫生睇0下，希望佢用D專用設備吸入耳仔裡面果篤咁擾人0既水。
結果醫生同我講，我耳仔裡面D水唔係外來水，而係由裡面谷入隻耳度。何解呢？原來係之前0既感冒菌入0左耳，導致中耳發炎積水。所以醫生比左D藥幫我打死埋D感冒菌死剩種之外，又要我滴鼻藥水。（我冇寫錯，係滴鼻，因為醫生解釋我知中耳同外耳之間有耳膜隔開，要醫就要從鼻入藥，因為D藥冇可能由耳窿入到中耳）
早知係咁就一早睇醫生啦，成個禮拜左跳跳右跳跳都唔知為乜．．．

10天健康波幅圖

回首自己過去10日0既健康情況真係可以用「差到無倫」0黎形容，加上正職同秘魯又一樣咁忙，連日休息不足令病情多日都係0係低位反覆徘徊：

27/MAR: 上晝返工至放工一直好好地，臨放工仲約0左小C去海典灣打波。點知0係返屋企程火車唔知係咪撞邪，成個人忽然間頭重重好唔舒服，不過當時只係諗最多打完波出身汗，再早D訓就應該會冇事，所以明知0係屋企食完夜晚飯出發去海典灣果陣明明已經覺得成個人好慶都冇理佢。結果果晚打（捱）完場兩個鐘之後覺得全身冒煙、關節酸軟，即刻衝出去睇康健夜診。原來已經燒成38度幾，入到去見到醫生馬上要求打針同埋比特效抗生素（以上兩點都係我主動要求），醫生可能見我咁死，再三叮囑我食哂D藥要去覆診。
醫療費：28.00（公司醫療保險診金）+40.00（特效藥）+20.00（打針）= 88.00

28/MAR: 經過一晚休息已經退左燒，但係之前果晚燒得火熱0既手腳關節仍然超級酸軟，加上事先已知道28號冇日本人0係公司，所以「乘亂」攞左1日假，訓足一日之後感冒情況緩慢好轉。

29/MAR: 戴口罩返工，渾渾噩噩0係公司過左一日。當晚做秘魯。

30/MAR: 出差返左一日大陸（返大陸唔敢戴口罩，驚俾人捉去隔離同研究），同埋廠家成棚人出去食晏，當然冇得戒口，加上覆診0既藥食哂，覺得自己應該要好返，0係一時鬆懈之下甜、酸、辣、蒸、炒、炸樣樣食勻；當晚仲約大哥0係萬象城食和民，之後就返香港，去康健覆診，但果晚已經唔係27號睇我果個醫生。
醫療費：28.00（公司醫療保險診金）+40.00（特效藥）= 68.00
果陣只係覺得有喉嚨仲有D頂住頂住同有D咳，但我堅持呢D係康復0既過程之一，於下決心食埋呢次藥就算，要靠自己0既抵抗力"NGAU"（請以廣東話第3聲讀出）好佢。

31/MAR: 懶洋洋0係屋企過0左一日，喉嚨仲有D頂住頂住、有D咳、開始失聲。當晚開始趕秘魯。

01/APR: 去左海典灣同曉峰打網球，失聲。（全程戴住口罩。當中大哥曾經以有損儀容為理由要求我除口罩），當晚做秘魯。

02/APR: 戴口罩返工。秘魯方面開始全面進入「全開狀態」(即1900返屋企先訓2-3個鐘，最遲2200起身食晚飯，2300全力衝刺，最遲0400訓覺)，埋下復發的禍根。

03/APR: 一朝起身消失0左兩日都唔夠0既喉嚨痛又返番0黎我身邊，心知不妙。返工全日戴口罩，又食左幾匙川貝琵琶露。放工0係火車一時諗唔開，竟然決心要唔戒口，強行令唔聽話0既喉嚨屈服，於是0係大圍火車站前0既「小蜜蜂」又食牛什又食豬紅翅，秘魯方面又連續第二日進入「全開狀態」，喉嚨當晚（應該話係兒童節0既凌晨）決定全面叛變！

04/APR: 竟然喉嚨痛痛到醒左（竟然比平時早0左半個鐘起身），戴口罩返工，返公司前買左盒使立消喉糖，仲每個鐘"PAK"（請以廣東話第1聲讀出）1粒試圖安撫喉嚨重災區，可惜完全無效！無論食野同飲水都好痛，總算知道咩叫做「食不下咽」。放工後以最高速度返秦石搵「最強幫手」蔡醫生幫手，結果被診斷出原來我唔係出普通喉嚨痛，而係「慢性扁桃腺發炎」，醫生仲建議我開刀切左個扁桃腺佢，費事佢成日玩發炎。醫生開左一個星期份量0既藥比我（其實只有2隻藥），叫我一星期後覆診。
醫療費：300.00

05/APR: 「訓覺．飲水．撒尿」呢3個不斷循環0既動作就貫穿0左我4月4號晚同今日大半日0既生活。醫生D藥果然夠堅，雖然只得兩種藥，但配合果3種動作，今日我扁桃腺0既腫痛已經接近完全消失。

總括0黎講，呢10日0既我真係被病魔折磨得太死，希望我可以好好利用呢個「復活節假」0黎完成復活啦！！

新書包

大概一年前0係時代廣場0既tumi專門店第一次見到T3 Ducati Balance Backpack,登時被佢0既流線型設計深深吸引，只係當時0既價錢實在太貴,所以幾中意都冇計...一年後0係銅鑼灣崇光tumi專櫃再度重遇佢,發覺自己對佢仲未忘情之餘,又發現平左DD, 0係官網度Register左之後仲有3年保養, 所以最後就0係狗年0既年廿九帶左佢返屋企。


　↑　黑+紅0既配搭帶來唔錯0既觀感。黑色跣水尼龍料、紅色0既PVC料同埋特別設計0既拉鍊配合,起到一定程度0既防水效果。

　

　↑　TAG上寫住0既「hybrix nylon/polyester fabric」好似係TUMI0既專利質料，特點係耐磨損和耐污。（唔知落0係我手上又會有幾襟呢．．．）

　　　　
　↑　整個bag間隔都算幾實用。最近背脊果格可以用黎裝電腦、火牛、雜誌；大格裝飯盒、電包、銀包、psp、水壺；內格裝PDA；出面果格裝散紙、鎖匙等小東東。


　↑　出面果格裡面有一個幾特別0既磁石鎖匙扣。(磁力好強!!)


　↑　背脊同揹帶用0左軟綿綿、符合人體工學0既網狀護墊, 揹幾耐都唔會辛苦。(咦?好似賣緊「白色太陽鎗」廣告咁0既....)


而T3Ducati 同普通T3版就在於:
1. 跟左個Ducati扣


2. 0係bag0既兩邊寫住大大個Ducati
　　
3. 兩邊個大pad位加上手抽位外層由尼龍換成紅色PVC


當然,任何BAG都會有佢0既缺點:
1. 我覺得都幾致命....就係佢個FLAP位太薄啦, 除非夾硬將個BAG塞到爆一爆, 由裡面撐起撐實個FLAP, 否則一揹上去個FLAP位就會夾生被拉到摺埋一住, 久而久之出現左一條核突0既摺痕....真係睇到都心痛
(模擬照片)
2. D拉鍊唔算太好拉

3. 佢兩條揹帶之間距離都幾長(接近20cm), 可能想就老外身形, 如果你個膊唔夠橫0既話隨時會「跌膊」


4. 右揹帶上個拉鍊格作用好似唔係咁大。(個售貨員話可以用黎放電話,我心諗「部電話都要好細0下先得喎」....)

不過整體上我對佢都好滿意, 相信有一排都唔駛買背囊LU....

P.S. 原來有好多日本人出差都會用TUMI 0既BAG, 睇黎TUMI 0係日本都幾有名。

LINKS:
TUMI介紹:(維基百科)

TUMI官網:

DUCATI介紹: (維基百科)

T3 Ducati Balance Backpack:

TUMICITY:(日本)

打網球

不經不覺,打0左網球已經有成3年幾...由以前去每個星期去小C度打兩日,直至馬鐵起好哂而家搬返去曾大屋打;由最初一場打成5、6個波出街,一散場要撲出去執,直至而家實行「打唔見一個波罰廿蚊」都一個月罰唔到好幾次...至今一直都仲未厭, 絕對可以話係繼羽毛球、踩單車、保齡球同長跑後最有恆心KEEP住做0既運動之一。鍾意打網球可能係因為覺得呢項運動好有個人風格,0係同一個規則下你可以用上不同的打法和戰術,你亦可以根據你唔同0既性格、技巧等以唔同0既職業網球員為學習目標, 0係集各家之大成(其實只係模仿)0既過程都係一種樂趣。

倒如我會希望學到片中Sebastien Grosjean咁0既超級靚西方式正手擊球:


發球方面當然要封洛迪克(Andy Roddick )做偶像啦:
(佢0既251km/h全地球最高發球速度紀錄好似仲未有人破到)
請集中留意片中06:50-06:08 0既發球分析,左邊0既洛迪克0係慢鏡下開個波都咁Q快,姿勢又靚絕,華實兼備,我問你怕未?


反手我最欣賞梗係瀟灑到震0既FEDERER啦:

片中01:05-00:26, 單手反手上旋球,動作似足「天翔龍閃」...駛唔駛咁型先?

我一定要好好以佢地為目標好好加油...一定要加油啊!!!

男子網球世界排名:
http://www.atptennis.com/5/en/rankings/entrysystem/

女子網球世界排名:
http://www.sonyericssonwtatour.com/2/rankings/singles_numeric.asp

OTHER LINKS:
1) 想睇清楚球手0既動作,不妨0係YOUTUBE用"球手名(英文)"<隔一個SPACE>"SLOW"0黎search就有好多野睇架啦
2) 老邪兄長個TENNIS CLUB: http://www.tennisbond.com/

終於等到佢0既新作啦！！

愛多80年　
作曲：馬永齡
填詞：阿秋
編曲 、監製：馬永齡
主唱：顏福偉

合法下載：　http://www.whiteflower.com/PublishWebSite/whiteflower/gallery/98551a9c-a83f-4e32-9a1f-7fbce3a6311e.wma

每日穿上套裝　機器式工作
沉悶化妝　何解遮蓋你臉龐
盼做富豪主角　用來換你供車作樂
不過失眠亦　發作

請掛起晚裝　揮去金錶束縛
其實更多　難得感覺　由你發落
就似拍拖　無需高檔堂皇　只憑簡單釋放
令無味罐頭　也變糖

來簡約地　愛多八十年　態度未曾改變
昨日新款在明日膚淺
為何尚要　眷戀爭先
贏得仰望　奪去了感覺　快樂也是幻覺
情人為你選的花　你也未觀看

不要千呎家　不愛金光璀璨
寧願去揀　床舖簡潔　陳設雪白
就算世間 　時興搶眼大話
堅持你的風格　
別人在笑嗎　懶理他

來簡約地　愛多八十年　態度未曾改變
昨日新款在明日膚淺
平凡像我　也於身邊
贏得仰望　奪去了感覺　快樂也是幻覺
情人為你選的花　你也未觀看

恆久　可以嗎　
要敵過時刻轉變歲月吧
試問有誰綻放一生　像雪花

日日　想得獎最後輸得鋪張
最簡單迴響　卻最響

來簡約地　愛多八十年
世事無常改變
昨日新款在明日膚淺
為何尚要 眷戀爭先
如果世事　未再有新意
八十歲後遇見
唯獨白色的鮮花　會繼續優雅
平凡但顯赫的花　變化亦不怕

喜歡顏福偉0既「白花油」系列歌，主要係因為：
1. 佢一D都唔濫產，一年先一首，絕對算得上係千錘百鍊，襟聽過好多流行歌。好容易將佢同埋日本0既TUBE（90年代時呢隊日本POP BAND只會0係夏天先出碟）聯想埋一齊。

2. 顏生0既歌0既歌詞好多都勵志、健康、甚至警世。例如今次呢首「愛多80年」就係講現代人生活0係功利行頭、紙醉金迷0既世界裡面，容易變得極度貪新忘舊，迷失自我。歌者憑歌寄意，希望現代人能夠作出反思，明白平淡是福，古老0野都好有值得欣賞0既地方（值得欣賞0既當然包括創業自1927年，今年已經有80年歷史0既包括白花油啦！佢果句「唯獨白色的鮮花　會繼續優雅」HARD SELL得0黎不失含蓄）

3. 顏生0既唱功其實一D都唔差，激昂又有，假音都交足貨比你，你仲想點？

--> 如果呢D歌冇白花油背景、大家又唔會嫌STEPHEN唔夠靚仔，會唔會比較容易D接受到呢D歌呢？

「白花油」系列歌
1. 去飛(2004)（顏福偉、彭家麗）-- 曲詞都相當順耳0既一首合唱歌，希望有日可以有人同我0係K合唱到啦


2. 夢想有你 (2005-2006)（顏福偉）-- 顏生同鄧浩光大板大板咁抽打盒白花油0既情景，令人印象深刻．．．


　一度成為大眾話題0既「夢想有你菲律賓版」-- PART A

　一度成為大眾話題0既「夢想有你菲律賓版」-- PART B
http://www.whiteflower.com/PublishWebSite/whiteflower/gallery/c47ca4a4-e00c-421a-a185-3cfa9c16f212.wmv

　「夢想有你勁歌金曲LIVE版」


3. 愛多80年(2007-???) -- 賀年版　（顏福偉）-- 期待睇到真正0既MV。


P.S. 除0左最上面0既「福仔」（http://www.whiteflower.com/e/product/product_detail.asp?sku=72　）之外，其實仲有個「勃勃」（http://www.whiteflower.com/e/product/product_detail.asp?sku=32　）架！你記唔記得佢玩咩運動架？

恭賀豬禧

各位好朋友，新一年又0黎啦！！今年係豬年，我祝大家心想事成，間中又可以好似豬咁少勞多得，甚至不勞而獲！！恭喜！恭喜！！

氣吞天下　　 佳偶天成　　　　天生神力　

0訓得．．．　　食得．．．　萬大事都．．．頂得！！！

豬年年初一0既大事主要有：

1. 今日原來係香港有史以來最熱0既年初一，最高有成攝氏25點幾度，0係電視見到有D猛男甚至著背心出街．．．同我地細個果陣要紥到成隻糉咁出街拜年實在太大分別啦．．．

2. 今晚7點有線新聞竟然有我「最喜歡0既女主播」頭兩名：紅卜卜Carmen同粉紅小公主沛然拍擋主持，簡直係我心目中0既「最強組合」，正呀！！！

P.S.原來日本0既豬年其實係「野豬年」，D野豬造型自然冇我地中國人0既豬豬咁可愛啦。

　　　　

橋保保

暫時仲未有MOOD寫佢住, 不過見佢個樣戇quarkquark咁就POST住出o黎同諸位分享下先

機械人動畫主題曲之滄海遺珠: Machine Robo: Battle Hackers主題曲

相信呢首歌應該係暫時世上獨一無二 、rap出0黎0既機械人動畫主題曲:　（如果你聽厭0左水木同埋影山D熱血野，就應該聽0下呢首正野，包你聽完後會加倍愛上水木同埋影山．．．）



詳細介紹:

ぶっちぎりバトルハッカーズ
Bucchigiri Battle-hackers

TVアニメ「マシンロボ ぶっちぎりバトルハッカーズ」（1987年）オープニング主題歌
収録CD：「マシンロボ ぶっちぎりバトルハッカーズ」
LD32-5051　1987年8月5日発売　東芝EMI株式会社
歌：五十嵐寿也
作詞：水谷啓二
作曲：あかのたちお
編曲：あかのたちお
3分23秒
歌詞--

(獨白)
オーケー！　みんなのってるかい？
俺たちゃ　ハミダシ野郎のアウトロー
自由に向かって突っ走る
ウィー　アー　ぶっちぎりバトルハッカーズ！

バトルハッカーズ!!
おれたちゃ恐れはしない
自由じゃアルゴのナンバー・ワン
アールジェダンは怒ればこわい
ドリルクラッシャーはつっぱり野郎
……無敵のバトルハッカーズ

千変万化モジュール・メカさ　（永不怕敵人係乜東西）
正義と勇気でパワー・アップ
ジェットライザー、ガルザック　（行動似閃電又識分體）
マッハブラスター　GO！GO！GO！GO！　（天空中英雄我最駕細）

おれたちゃ　アウトサイダー　（太空奸魔一拳0訓低）
固いルールは苦手でも　　　　（以我勇氣照顧世界的一切）
悪いやつらにゃ負けないぜ　　（星空中黑心魔王我要佢炸毀）
最後の勝利はマシンロボ　　　（力量最勁精通世上樣樣武藝）

バトルハッカーズ!!
グレンドス　わるーいやつらさ
ズルさじゃ宇宙のナンバーワン
デビルサターン　キャスモドン
ファルゴス、ザリオス　ぶっ倒せ

おれたちゃ　アウトサイダー
固いルールは苦手でも
悪いやつらにゃ負けないぜ
最後の勝利はマシンロボ

バトルハッカーズ!!
おれたちゃ逃げたりしない
ガッツもアルゴのナンバー・ワン
プロトラックレーサーは頼りになるし
ガッタイザウラー　力持ち
……ぶっちぎり　バトルハッカーズ

絶体絶命　危ないときも
正義と勇気でパワー・アップ
ウルフに、ジャックに、ホットロッドジョー、
スピードあげて　GO！GO！GO！GO！

おれたちゃ　アウトサイダー
固いルールは苦手でも
悪いやつらにゃ負けないぜ
最後の勝利はマシンロボ

バトルハッカーズ!!
ロック・キラーはドラッグサム
不良じゃ宇宙のナンバー・ワン
ガイガーロック、デビルロック、
ロックン・ロールでぶっ倒せ

おれたちゃ　アウトサイダー
固いルールは苦手でも
悪いやつらにゃ負けないぜ
最後の勝利はマシンロボ

おれたちゃ　アウトサイダー　（太空奸魔一拳0訓低）
固いルールは苦手でも　　　　（以我勇氣照顧世界的一切）
悪いやつらにゃ負けないぜ　　（星空中黑心魔王我要佢炸毀）
最後の勝利はマシンロボ　　　（力量最勁精通世上樣樣武藝）
最後の勝利はマシンロボ

（其實係唔係首歌一RAP，D詞就一定要咁爛0既呢．．．．你0係D歌詞度介紹埋哂D忠奸角色名同佢0地D性格把托咩．．．）

呢套動畫其實係「マシンロボ クロノスの大逆襲」（即係無線0既「天威勇士」）0既續集，曾經0係金錢台播過，當時金錢台好明顯完全冇打算谷呢套動畫，起名又懶又馬虎唔在講（好似叫乜叉野「新天威勇士」．．．），仲同佢首OP填左隻爛到無倫0既廣東詞（不過日文原裝詞都爛成咁，就算比臨直同歪聞填，我諗都好難起死回生LU．．．．我已經將仲記得0既部分廣東詞寫0左0係相應0既日文詞旁邊，歡迎各位高人出手指正、補完）

話時話マシンロボ已經發展出一個系列囉喎：
1986: マシンロボ クロノスの大逆襲（天威勇士）
1987: マシンロボ ぶっちぎりバトルハッカーズ（新天威勇士）
2003: 出撃!マシンロボレスキュー（機甲露寶）<--我想講0既係呢個譯名差過哂上面果兩個...我最初聽到仲以為係以前「鐵甲小寶」(http://hk.geocities.com/my_ordinaryworld/p_bo.html) 果類0既動畫添....真係辛苦哂

資料出處：
癲雞勇士
http://ja.wikipedia.org/wiki/%E3%83%9E%E3%82%B7%E3%83%B3%E3%83%AD%E3%83%9C_%E3%82%AF%E3%83%AD%E3%83%8E%E3%82%B9%E3%81%AE%E5%A4%A7%E9%80%86%E8%A5%B2
新癲雞勇士
http://ja.wikipedia.org/wiki/%E3%83%9E%E3%82%B7%E3%83%B3%E3%83%AD%E3%83%9C_%E3%81%B6%E3%81%A3%E3%81%A1%E3%81%8E%E3%82%8A%E3%83%90%E3%83%88%E3%83%AB%E3%83%8F%E3%83%83%E3%82%AB%E3%83%BC%E3%82%BA
機甲露寶
http://www.sunrise-inc.co.jp/mrr/

特別鳴謝: 多謝黃老邪教我點embed youtube 0既clip入個content度, thx!!

「明年今日」同埋「不如不見」

由於自己部ipod有成4g，所以過歌一向唔駛點樣就住就住咁揀，但副作用就係成日會0係 ipod響起一D平時好少揀0黎聽0既歌．．．「咦？乜隻碟有首咁0既歌0既咩？」．．．今朝0係火車忽然響起左一首陳奕迅0既歌，叫「不如不見」，我覺得真係好正（其實可能係EASON先至唱得咁好聽），細味一下歌詞，平凡得來又會令人感動，我覺得「不如不見」同「明年今日」都好似係描寫緊同一個情況，不過當事人0既心態就南轅北轍LU....

連曲詞都係同一班人，真係幾橋喎．．．．
P.S. 其實呢個題目我都係跟人口水尾借題發揮0下0架咋．．．． : p
http://blue5663.mysinablog.com/index.php?op=ViewArticle&articleId=401268

美味午餐 －－ 「王將」天津飯餃子套餐(更新版)

只要屋企冇飯帶，我就會去王將繼續買我最愛０既天津飯餃子SET返自己張枱度慢慢享受。不過最近我發現到天津飯有一個version，叫做「白雪天津飯」。我睇個名同張相都好似好靚，上個禮拜就試０左一次．．．．


所謂「白雪天津飯」，就係將本來淋上蛋飯０既醬油芡改為由蛋白同蟹肉煮成０既芡汁，其餘０既內容同天津飯全無分別。



唔知係先入為主，定係自己淨係鍾意食濃味０既野，蛋白蟹肉芡對我０黎講太清淡啦，天津飯上０既蛋本來就冇乜點調味，如果加上清淡０既芡汁，豈不是淡上加淡？所以我試左一次之後便決定食返正宗０既天津飯lu．．．．．

P.S. 　1. 王將０既炸雞球都可以架
2. 天津飯set已經加左價, 唔好再諗住拎張50蚊就可以埋單

新城古巨基夢想共和演唱會 （灣仔會展）

今個星期一（4號）收到黃老邪用唔知神秘定係眼訓0既聲線打0黎0既電話，問我星期二得唔得閒睇古巨LEI演唱會，我見未睇過古巨LEI唱LIVE，所以就應承0左。陣容基本上係上次睇華健演唱會0既翻版：黃老邪+康比+康媽，不過再膽拖康比家親族一行人。
同黃老邪+康比會合後，就0係一間茶餐廳度食左一個好好味0既梅菜扣肉SET，之後再出發去會展，同康媽及康比家親族會合。
本來人家請你睇演唱會，就唔應該有乜野怨言0既，不過我真係唔知新城D SHOW係咪一直都係咁，以下只係我個人主觀0既感想：

1. 你揀會展OK，但係駛唔駛揀到最高果層?　由入會展到搭電梯入到會場已經用左成四五個字啦！

2. 成場都係得果3個鐘，請咁多嘉賓做乜呢?　當晚嘉賓有鄭融、鄭X聰（都係唔記得咩名，我淨係記得黃小衛猛咁0係我耳邊話佢以前同柏林仔一樣係童星，又話佢點樣搞大左某人個肚．．．）、EO2、方力申、王菀之（出場序）
　　綜觀成場0既編排就係：
　　a. 巨LEI同嘉賓大合唱開場
　　b. 巨LEI同單一嘉賓合唱
　　c. 單一嘉賓唱一至兩首自己歌
　　d. 巨LEI閃出0黎唱一首自己歌
　　（然後loop返上去b）
　　e. 唱哂所有嘉賓後，巨LEI出0黎唱三首歌（我願意、追、愛得太遲）
　　f. ENCORE：巨LEI同嘉賓大合唱「勁歌金曲」埋齋
　　--> 0係呢個咁0既編排下，巨LEI變0左大配角，出場時間最多0既反而係D嘉賓，但D嘉賓又壓唔到場，我唔會話悶，只不過係全場無出現過任何高潮0者．．．以我所見，四周0既觀眾一D都唔算投入（除左個別熱血硬派0既粉絲）

3. 當晚咁多個歌手中我覺得唱得最好0既係王菀之，佢把聲真係好靚好乾淨，不過只限唱歌果陣。如果我係ケンくん，個女朋友成日用把咁０既聲同我講野，我諗我一早綁住舊石0係佢隻腳度，然後伸佢落海。

4. 到今時今日我都分唔到E-KID同Eo2呢兩隊野有咩分別，我亦唔想深究，我只係知道我對果個黑超光頭佬異常反感。

5. 中間過場0既「夢想」短片完全無POINT，唔知佢想UP乜。

我想聽「愛的解釋」、「想說笑」（唔係笑說想）、「藍天與白雲」、「第二最愛」、「美雪美雪」呀！！希望巨LEI你會聽到我0既訴求。

演唱會好唔好睇係一回事，最後我都要多謝黃老邪、康比同康媽請我睇呢場演唱會！黃老邪、康比：ほんまにおおきにです！康媽にもおおきにです！

相關連結--
1. 古巨基個BLOG:
http://hk.myblog.yahoo.com/leo-ku
2. EO2:
http://www.eo2.hk/
3. EKIDS:
http://hk.geocities.com/ekids_ekids/

MY GADGETS (this week)

原來每日都攞住咁多野返工....

超級機械人 (FOLLOW UP)

終於比我搵到啦！！！！！！！YEAH~~~~~~

http://hgpa.net/php/forumdisplay.php?fid=4&page=4

呢位Eric先生真係太勁啦！好0野！

超級機械人

最近無厘頭狗搵到一個個人認為幾正o既超級機械人0既彩圖網頁：
http://www001.upp.so-net.ne.jp/STUDIO-SA/gallery/
裡面有好多好多又靚又經典o既機械人彩圖(有D仲可以用o黎做WALLPAPER添！)，就連我一直都好鍾意，N年前0係金錢台播過、偏偏又好似被人遺忘0左o既「光速電神アルベガス」、「逆転イッパツマン」中的「逆転王」同「三冠王」都有！鍾意超級機械人0既朋友仔可以上去睇睇。

講開細個o個陣睇超級機械人，除o左最重要o既「機設」外（睇o個陣仲係年幼無知o既我應該唔會識欣賞「人設」），OP、EYECATCH同ED都令人留下深刻0既印象。不過0係香港要聽到真正o既機械人動畫日文原裝OP、EYECATCH同ED，簡直就係難過登天．．．EYECATCH可能仲有機會獲得倖免，但OP同ED就．．．可能為0左創造就業機會俾一眾歌手，無記同亞記都同幾乎所有o既動畫OP日文原裝同ED玩舊曲新詞、甚至新曲新詞！！（我仲好記得以前A-CLUB有班人都鬧呢樣野鬧得好勁）我承認當中有D真係填得唔錯，但係令人聽到R哂頭就更多！！無記o既呢類「兒歌」，大部分都已經可以０係PAZU（http://www.pazu.com/）搵到，而家就憑我僅有０既記憶為大家介紹三首金錢台版機械人動畫金曲：

「光速電神阿佩格斯」主題曲（金錢台版）


GAGAGAGAGAGA....，惡霸你休想得到一寸土
難做到難做到難做到難做到　竟休想將我踢倒　毅力至高
千秋基業　怎可任你擺佈　仇恨無數　我要聲討．．．．
今日鬥爭　他日願望有信心　以鐵血保護眾生　做做做　肝膽戰士．．．
（副歌略．．．因為真係完全唔記得）

「超獸機神」主題曲（金錢台版）


XXXXXXXXXXXX和平（唔記得）　但願合力共護衛疆土安定
無畏萬般絕境　頑抗敵方靠一身本領
衝宵飛上了銀河　全力齊出擊　追殺萬惡敵兵！
步步亦齊共上　若係人人齊心必會取勝　合力互助　妖魔盡掃清！
為和平全力拚　但願共赴患難一於要取勝　亦願在日後共負新的使命！

「銀河烈風」主題曲（金錢台版）

陰陰沈沈0既一星期.....

各位朋友仔，請燃點你心裡面０既太陽啦！！
（今個星期六日又會落雨．．．我幾個星期冇打網球啦．．．．頂！）

巧遇海堂前輩

上星期去朋友０既會所打網球，竟然俾我撞到又COOL又有型０既海堂前輩！！我當然把握機會上前同佢打招呼，同埋希望同佢影張相留念啦！點知佢０既反應非常咁冷淡，仲一口拒絕０左同我合照添．．．我迫於無奈只有請求佢本人俾我影一張相，好彩佢最後都應承０左．．．



希望下次可以撞到手塚同阿乾就好LU...

美味午餐 －－ 「王將」天津飯餃子套餐

０係返工0既日子都會選擇帶屋企飯，因為怕落街同人迫（遇著大熱天時或者橫風橫雨就更加煩），加上新公司附近０既野食都好貴０下（稍為似D樣０既都要成30幾40蚊．．．）。不過上星期有一日冇帶飯，結果落０左新港地庫0既日式餃子專門店「王將」（http://www.osaka-ohsho.com/tenpo/hongkong.html）試０下佢D「日式中華料理」。我自從食0左佢果「天津飯（テンシンハン）餃子（チャオズ）套餐」之後立即愛上，並且立志每星期都要食一次！！



撇開０個兜淡茂茂０既蛋湯唔講，天津飯上面果PAT巨型０既熱辣辣炒蛋就足以令我呢個蛋癡歡喜若狂！！配合用日本醬油整０既芡汁，每一啖飯都充滿住蛋香，真係好好味０架！！當然餃子方面都相當唔錯，話哂都係王將０既招牌菜嘛！不過我自己本身對日式餃子唔係太欣賞，所以對佢０既喜愛當然唔及天津飯啦！（呢d係咪就叫做妹仔大過主人婆呢）

呢個餐好食就好食，不過都有個缺點：一個餐盛惠港幣50大元！！

有關日本餃子０既另一個網頁：（喜歡餃子者必看！）
http://www1.odn.ne.jp/cjt24200/yamada/text/m/index.html

2006年8月6號

今日，2006年8月6號，個人0黎講係一個非常值得紀念同慶祝０既日子。原因當然唔係D乜鬼0野廣島原爆61週年紀念呢D咁嚴肅０既事，而係小弟０係Yahoo麻將轉虧為盈０既大日子。自從上年差唔多時間(都係７月尾８月頭左右)由正數變成負數後，之後足足一年０既成績可以用「一蹶不振」０黎形容，最大鑊果陣一度出現-20000分，而我對yahoo麻雀０既熱情同鬥志亦一度跌落谷底．．．每次一睇見曙光，成到一舖清一色雞糊無幾耐，就馬上被對手用清一色平糊、甚至十三么等毀滅性０既招數回敬，做「包大人」（包人地12張自摸）更加係平常過平常．．．

０係呢段麻雀事業０既低潮期，我反覆檢討過自己０既打法同心理質素，發覺無乜大問題，對手亦唔係勁到可以令我每戰必敗０既程度。最後我得出一個結論：「行衰運！」於是我０係今年7月尾改０左個用０－左輸足成年０既用戶名同埋相，真係唔到你唔信邪，改０左名之後，做莊０既百分率提升之餘，一起手牌又靚０左，又好摸手０左，結果經過10多日０既苦心經營，終於憑住多次０既清一色同混對、一舖十三么、兩舖清對成功收復失地，今日更加用一舖小三元混對轉虧為盈！YEAH~~YEAH~~YEAH~~！！

<-- 能夠成功而漂亮咁轉虧為盈，全靠呢個新綽號。
　　多謝先！KURURU曹長！（雖然我覺得田中會更配合呢個綽號．．．）



我而家０既分數係6,800幾，希望可以有機會重上甚至突破一年前０既40,000幾分就好LU....

搬寫字樓

由於公司慘比業主逼遷，結果0係6月尾公司就由寶勒巷搬左去新港中心，雖然我返工花多0左時間（以前去到尖東站行過去就得，而家就重要0係尖東站中間道出口再搭駁腳巴士或者小巴先得），不過新寫字樓０既檔次同寶勒巷可以講係完全唔同，加上附近有好多舖頭（Ocean City、海運等），以後放0左工都唔愁無去處囉。（仲有一樣好處，0係廣東道一帶見到靚女0既機會率比寶勒巷大得多．．．）

搬0左之後公司最大0既分別（進化），就係終於可以一個人一部電腦！我亦都隨即告別每日帶私伙電腦返工0既歲月。至於我個位都比舊寫字樓寬敞多了，不過寬敞還寬敞，我0係0黎緊0既日子仍然會貫徹我0既一貫宗旨：「亂中有序」！！