霍元甲在亞記!?

頭先睇電視, 先知道0係播哂「倚天屠龍記」之後, 亞記第n次重播甄子丹陳真版0既「精武門」, 雖然甄子丹D表情有時真係幾誇張, 但係睇佢打就非常賞心悅目, 快、狠、準!!
而今次呢個凌晨一點半至兩點半0既深夜時段重播劇更罕有0咁得到贊助者商冠名播出, 全名是「優之良品特約: 一代宗師霍元甲之精武門」(!?) 我見到睇個標題當堂呆0左....而家李連杰套「霍元甲」收得0者, 唔駛咁又拉埋霍元甲落水呀? 劇中主角根本就係陳真, 而唔係霍元甲, 一下子改成咁好誤導人0者....我寧願佢老老實實, 整個黃元申「大俠霍元甲」搭梁小龍「陳真」0既combo,可能仲夠經典, 仲多人會追0黎睇!!
不過如果各位真係想一睹「新精武門」中由高雄飾演0既霍元甲0既英姿和武功修為, 最好盡快開始追啦, 因為佢冇幾耐就會俾人毒死, 佢死個場仲會非常耽美0添.....啊, 仲可以睇到少女版戴夢夢(飾演陳真個妹小燕)0架!



碩果僅存0既劇情及人物介紹: http://myren.hp.infoseek.co.jp/donnie.htm

恭喜發財, 狗年進步!!

大年初一啦!! 0係度祝各位朋友仔身體健康, 心想事成!! 一直都唔記得雞年係冇年卅晚, 所以覺得年初一好似一下子就出現0左...總之大家逗多D利是啦。




← 屋企簡單0既新年擺設。 我最中意就係0個對「狗男女」...

克勤, 恭喜你!!

為0左星期一一朝早就可以去D廠家度開會, 0岩0岩過0左果個星期日下畫就同0左D日本客上定去大陸。當晚應酬完返到酒店房, 正在無所事事之際, 網上0既朋友仔提醒我睇勁歌頒獎, 我亦都見證到克勤再奪「最受歡迎男歌手」0既一刻!! 其實事前對呢個獎已經有多方揣測, 有人估劉華、有人估EASON, 但我由始至終都認為應該係克勤! 唔係因為我中意克勤先咁講, 實際上在過去一年, 克勤的確比佢其他競爭對手0係歌唱事業上有更大作為、進步, 所以佢得獎, 我只可以講一句:「實至名歸」!!

以下一段是克勤0係16號晚0係佢0既官方網頁中對歌迷0既留言:

昨晚真的很開心，一直開心到現在！ 謝謝你們的祝福，及昨晚人強馬壯的打氣團，能夠拿大獎不是我一個人的功勞，是要很多很多人的配合，天時地利人和，當然還有你們啦！我的歌迷「間唔中」都會叫得好「行」的，哈哈！ 今天沒有休息，要排舞，今次會跳得和以前不太一樣，會有一些驚喜給大家！阿姐和Kelly是初一嘉賓，校長是尾場，華仔？昨晚忘記了問他，只記得「屈」他做伴郎！

今年克勤得「最受歡迎男歌手」後, 爆出0左「會0係2006年內結婚」0既宣言, 將當晚氣氛推到高潮。

同類型0既「豪情壯語」,我仲諗到2001年許志安得「最受歡迎男歌手」果陣講0既「廚房宣言」; 仲有, 萬子1992年娶恬妞,0係電視城擺酒(無記全程直播整個喜宴, 仲冠名為《萬紫千紅喜迎親》) 果陣講果句「我0地三個人(計埋恬妞個女), 一條心、一條命!!」.....

其實有D 0野, 真係唔適宜當住咁多人面前講0架...兩個人心照咪得囉...

李克勤官方網頁: http://www.hackenleenet.com/index_flash.htm

終於結婚了!!

嘻嘻....結婚0既當然唔係我啦! 係我0地博覽之友(PLCY)0既成員阿的就真。經過六年0既愛情長跑, 阿的終於0係2006年1月8號同女朋友(以後要叫阿嫂啦...)Carmen拉埋天窗啦!真係可喜可賀!! 恭喜哂!!

一如所料, 1月8號博覽之友空群而出, 組成0左一支又疊馬又嘈到拆天0既兄弟部隊 (人數足足係姊妹團0既一倍有多),0係當日清晨6點半已經到達馬鞍山,整裝待發, 跟住就浩浩蕩蕩0咁去接新娘, 註冊同埋幫手擺酒。由於我0地人手同車輛都非常非常咁充足, 基本上全日過程都算相當之順利。

我0係當晚0既婚宴裡面負責做MC, 其實自己真係好耐都冇拎住支咪對住咁多人講0野, 所以非常緊張 (尤其是婚宴。因為一失敗或者講錯0野0既話, 唔單止自己瘀皮, 仲可能會令人0地一生人一次0既婚宴出現碬疵) 不過既然決定要做, 就一定要做得好好睇睇。婚宴開始之前同女司儀已經對0左N次稿, 一到show time, 實行心口寫個勇字, 最後冇講錯/漏稿之餘, 又爆到0下肚, 都總算順利過關啦。

跟住同大家分享0下當日幾段小插曲---

1. 俞基撞車: 事發0係接完新娘到男家敬完茶, 準備前往文化中心註冊0個陣。雖然我0地有4個兄弟因為要跟俞基車而遲0左出發,但俞基最後都可以用高速及時趕到文化中心, 可惜臨尾香, ゛tun゛車0個陣撞到條燈柱, 好彩佢剎得切車, 只係左邊車尾High花0左小小....

2. Fatbee食牛肉乾: 呢單0野我都係聽返0黎咋。擺完酒, 搞掂哂D 0野之後, Fatbee就揸車送D兄弟返屋企, 但因為唔小心超速而被請食牛肉乾....

3. 九鐵同事: 新郎哥班九/馬鐵同事聲勢非常浩大, 尤其是大圍0個班同事, 出0黎影相0個陣一湧而出, D人多到勁過哂男女家d親戚...(其實當晚0既大圍站係唔係已經因為冇人當值而閂0左呢)

4. 大哥「隨時候命」: 大哥最初因為被編入佢認為係投閒置散0既「西餅小狼隊」而一度感到有志難伸,懷才不遇, 最後0係臨開席0個陣臨時被任命為「博覽特派記者」,全場奔走訪問男女家0既爸爸媽媽同埋兄弟姐妹, 據知情人士透露, 大哥訪問內容非常生鬼搞0野, 相信佢本人亦宣洩0左其無盡0既表演慾!

最後再一次祝福阿的同的嫂永遠幸福快樂, 新屋入伙順利, 開開心心!! 當然最好就快D製造第二代博覽之友啦! 到時十幾個契爺, 錫都錫到佢燶啦!!阿的, 有so架, 諗諗佢!

P.S. 兄弟們, 其實0係咁多道婚宴菜裡面, 我最鍾意就係炸蟹鉗(我當晚就刷0左兩隻)! 所以你0地以後擺酒, 都要效法阿的, 加入炸蟹鉗, 知冇?

藝名

最近睇返日本樂隊GLAY0係上年3月舉行0既演唱會DVD，忽然間好想知道返隊中各人0既真名，於是就上網查啦，結果查到：

TERU: 小橋照彦
TAKURO:久保琢郎
JIRO：和山義仁
HISASHI：外村尚

既然戚起0左條根，就上網用0左食飯時間搵0左D日本同中港台藝人0既藝名同真名，同大家分享0下:

日本
松たか子　--　藤間隆子
倉木麻衣　--　青野真衣
椎名林檎　--　椎名裕美子
小雪　--　加藤小雪
AIKO　--　柳井愛子
早見優　--　井上和美
西城秀樹　--　木本龍雄
浅野忠信　--　佐藤忠信
真田広之　--　下澤広之
郷ひろみ　--　原武裕美
椎名桔平　--　岩城正剛
渡部篤郎　--　渡部篤
いしだ壱成　--　星川一星
瀬戸朝香　--　家田恵美
和久井映見　--　和久井良子
優香　--　岡部広子
松嶋菜々子　--　松嶋奈奈子
飯島愛　--　石井光子
黒木瞳　--　伊地知昭子
華原朋美 -- 下河原朋美
川本真琴 -- 川本和代

中港台
　男子組　－－　
　

　女子組　－－　



有D好似真名0既原來係藝名、有D人連自己個姓都改埋、有D人個真名甚至同其他明星個名一樣．．．認真係「真實假象，無色無相」．．．．

HAPPY NEW YEAR!!

已經到0左2006年啦!!希望各位朋友仔(同埋朋友仔0既親朋戚友)0係新一年裡面生活得幸福愉快!有任何麻煩事可以憑住意志(或者運氣)盡早克服(或者避開)!恭喜恭喜!
如果2005年覺得有乜做得未夠好0既話, 不妨0係2006年好搞掂埋佢啦!

馬鐵全月通

前幾日用0左200蚊買0左「馬鐵全月通」。其實我等0左呢張優惠票已經好耐, 之前出東鐵全月通果陣反應太慢, 到0左想買果陣已經冇0左優惠價, 當時真係非常咁呻笨。誰不知低處未算低, 隔0左冇幾耐田北辰就推出0左一個更平、更加適合我0既馬鐵全月通出0黎。

呢張票0既規則好簡單, 只要一程火車裡面, 入閘或出閘0既車站是但一個係馬鐵任何站(但係要留意係唔包括大圍站0架) , 就可以計入「全月通」範圍。最後經過我下列0既計算後, 我就毫不猶豫咁買0左：
平日返工: (來回車公廟站同尖東站)
冇用全月通 : HK$8.70 x 2(來回兩程) x 25(工作天) ＝　HK$ 435.oo
用0左全月通 : HK$ 200.oo包哂
去小C度玩: (來回車公廟站同恆安站)
冇用全月通 : HK$4.5 x 2(來回兩程) x 4 (大約次數) ＝　HK$ 36.oo
用0左全月通 : HK$ 200.oo包哂

總數每個月坐底慳成兩舊幾水（仲未計上述兩個情況以外0既其他情況），所以真係非常化算，加上月票可以做入我隻八達通手錶果度（以前東鐵全月通只可以做入卡型八達通度），對我０黎講就更加方便。雖然話最初只會推行半年，但希望呢個咁正0既計畫可以繼續落去．．．．

「馬鐵全月通」網頁　　：　http://www.kcrc.com/chi/services/news/index.asp?ref=17234
東鐵同馬鐵車費計算 ： http://www.kcrc.com/route/er/er.asp?lang_id=2

克勤新碟「李克勤演奏廳」聽後感

本來買0左部ipod, 本來部ipod可以裝成1,000首歌, 偏偏0係呢兩個星期淨係識set去聽0個隻克勤「李克勤演奏廳」。10隻歌，一有空閒就想聽，就係咁．．．不斷不斷重覆重覆咁聽足兩個幾星期，直到而家竟然仲未悶。（以我呢種極度貪新忘舊0既人0黎講，呢種現象可以話係相當反常）可見有Heart 0既作品的確值得一聽再聽。

睇返D資料，原來呢隻碟前後用0左成9個月籌備，花0左成百萬製作費，用現場收音0既方式錄製，李克勤同4大樂手、彈鋼琴０既趙增熹同埋一班工作人員，困埋0係一間音樂學校0既音樂廳進行錄音，只需要一日時間，用0左2 Take克勤就可以以「零暇疵」0既姿態完成哂全部10首歌0既現場錄音（其實連埋錄影）工作。仲有,呢隻碟係Dual Disc（雙面都有Data 0既碟）, 即係一面係CD，淨係得歌；另一面係DVD，收錄哂成個 現場錄音0既過程。

個人喜歡0既順序如下：
<<輸情歌>>
－－　典型悲情歌，Melody真係好正，配合克勤充滿感情0既聲線，令我更加愛它！

<<十年前後>>　　
－－　克勤包辦0左呢隻碟中填0左5首歌0既詞（其餘5首就由陳少琪填），而呢隻歌就係最後完成0既一首（0係錄音當日歌詞仲作緊最後修改）相信係填得最有心機0既作品，講述一個移情別戀0既人悔不當初0既故事。

<<常在你左右>>
－－　內容同上面0個首「十年前後」完全相反，講述一對性格不合０既情人分0左手，但係可以做返好好好好０既朋友，互相關心，態度積極。唔－－但係會唔會略嫌太理想化呢？

<<情非首爾>>
－－　一隻碟任你點破格都好，只要你係０係香港賣，就始終都要有一首易上口、又食住香港最流行形勢（韓風）0既PLUG歌．．．

<<婚後事>>
－－　打算短期內結婚、或者籌備緊結婚0既人盡量唔好聽太多呢首歌（笑）

<<婚前的女人>>
－－　唔駛問阿貴又係比盧小姐聽0架啦！當我一聽到過句「想　很快樂　想　沒煩惱　想　生個聰明寶寶　　可否做到．．．」，就會諗起今個星期有本八卦周刊話盧小姐積極補身為生仔做準備．．．

<<未成年同盟會>>
－－　係向講一套做一套0既成年人提出０既控訴。個人覺得好似「勤仔」0既續篇．．．．

<<韓夜不冷 >>
－－　適合臨0訓前聽０既抒情小品。

<<勝情中人>>
－－　用0黎冧0下女朋友／老婆啦。

<<阿李爸爸>>
－－　快歌。講述父母面對沈迷上網０既子女０個種０既無奈、妥協。

　　最後想講０既就係四大樂手裡面０既龍向榮博士，佢真係非常搶鏡，因為0係DVD所見，錄音０個日佢準備0左多不勝數0既敲擊、搖擊樂器（多都要派哂０係塊地上面．．．），當中有好多奇形怪狀、我見都未見過０既０野，佢一攞上手就可以玩出聲，而且玩到出神入化，真係「近」！！

P.S. 此碟貨源已經回復充足，我最後用０左HK$88.00帶0左呢隻正碟返屋企，非常開心！！

冬天又來了

各位朋友仔，今個星期中段開始又寒流襲港啦．．．睇下有幾凍先．．．．

凍哩？問你０地怕未？得著多件衫啦！！（尤其是沖完涼出０黎同埋第二朝一起身０個陣．．．）加上天氣非常乾燥，最好補充多D水分啦．

跟小衛哥哥口水尾, 寫0下戰隊...

日本東映戰隊系列真係由細睇到大、再又大睇到老.... 記得自己細細個跟住屋企人去新世界中心0既東急,就會衝去圖書部門狂刨一堆全日文0既兒童雜誌(有卡通片同特攝片最新劇情、又有小勞作送0個隻), 有時仲要買埋返屋企, 而戰隊片0係呢D兒童雜誌裡面都佔0左幾重0既篇幅....0係電視方面，由早期0既五勇士、皇牌特擊隊, 至到而家0既忍風戰隊, 香港電視史上雖然冇掀起過戰隊熱, 但亦都算係「怎」住播, 戰隊片持續成為香港電視史的一小部分, 其實都幾值得我0地多D了解0下:

通常戰隊系列0既因素有(歡迎增加)：
1. 　戰隊片0係日本係晨咁早就播（例如星期日早上7點半）

2.　戰隊成員以男性為主,一個至兩個女成員，不過絕對唔會有男女感情線（怕教壞細路乎？）－－ 女成員戰鬥服顏色多數粉紅和黃色．但亦有藍色（如超獸戰隊0既藍豚戰士）

3.　敵軍大將總是面目猙獰，又會有一個口水多多０既「歡樂バカ」，成日串D剛剛被戰隊打敗0左0既幹部,當然唔少得一個衣著性感０既爆乳女幹部啦！！

4.　如果第一集開始是三人編制0既話，都咁上下就可能會有兩個新人加入，令戰隊成為五人編制

5.　明明被戰隊打死0左0既怪人係都要巨大化（鏡頭通常會先由下影向上，咁就表示巨大化0左0既怪人非常巨大，再由高空ZOOM住班戰隊，就表示0係巨大化怪人眼中D戰隊有幾細粒．．．），俾戰隊0既機械人正式打爆．．

6. 戰隊D機械人一定會0係故事中段「大破」（嚴重損毀），然後就會有新機出現，出現多部機變形合體0既盛況．．．

7. 每名戰隊成員都有正規裝備（如匕首、手鎗等），再按照個人0既特長加上專用武器。（如紅戰士用長身寶劍、力量型黑或黃戰士用斧頭、粉紅戰士用弓箭、啦啦隊指揮棒、新體操用0既絲帶棒等等），而「電擊戰隊」更開創0左將各人武器合體成一件用來了結怪人(Normal Size)的重型武器（通常是大砲）

8. 0係故事中後段有時會有一個懶係敵友難分0既獨行俠出0黎搞搞震，但冇幾耐又會死死地氣咁加入戰隊

9. 通常會有一個角色戰隊負責指揮同埋後勤工作, 佢可以係博士、樹精、甚至係一隻識講0野0既動物... (話時話, 有冇人知而家忍風戰隊0個個指揮官係隻乜動物?)

其實戰隊系列一早應該被淘汰啦，點解仲可以長拍長有呢？唔明．．．．最厲害0既係佢仲可以禍延埋美國0個邊，大家記得GO GO POWER RANGER嗎？OH SHIT!

東映戰隊Official Site: http://www.super-sentai.net/sentai/index.html
美國Power Ranger Official Site: http://tv.disney.go.com/jetix/powerrangers/index.html

P.S. 其實當年0係日研一班男仔都叫做探討過其中一部戰隊片0既劇情(應該係「人設」至0岩), 唔知大家記唔記得?

無題

←　呢張相係今個星期頭上大陸睇廠0個陣0係其中一間廠影0既…

Yahoo麻雀

唉....最近只係0係Yahoo麻雀度轉一轉個網名0者, 就輸到一發不可收拾, 由最風光0個陣0既4萬幾直插到而家0既負數....唔得!我一定0黎一個大翻身!!!!

克勤新碟 -- 李克勤演奏廳

尋日聽阿BIRD少話呢隻碟買88蚊, 今日即刻同smallsze撲出旺角買, 點知全旺角都賣緊139蚊!! 我即刻打俾BIRD少, 問佢呢隻碟係咪分普通版同豪華版, 佢話無, 結果0係唔想俾人當Water Fish0既心態下, 忍痛唔買返0左屋企。之後我諗過可能由於呢隻碟用0左特別0既技術(至於係咩技術我就唔清楚啦)錄製, 音色超靚, 所以吸引0左一班音響發燒友加入搶購, 市價可能因為咁而推高0左....

克勤!你好0野!!你0係樂壇真係仲有排玩呀!!!

向無名英雄/雌致敬!!

係朋友劉力Send俾我0既,同大家分享0下啦:

http://princessdiane.com/oldies/tv-oldfriends-male90s.html
http://princessdiane.com/oldies/tv-oldfriends-male80s.html
http://princessdiane.com/oldies/tv-oldfriends-male70s.html
http://princessdiane.com/oldies/tv-oldfriends-male60s.html

http://princessdiane.com/oldies/tv-oldfriends-female90s.html
http://princessdiane.com/oldies/tv-oldfriends-female80s.html
http://princessdiane.com/oldies/tv-oldfriends-female70s.html

下次0係街度見到佢0地, 記住同佢0地打招呼0刺!! （當然有D仙遊0左０既朋友就梗係少見為妙啦．．．．）

冬天來了

今個星期尾開始天氣會變得好凍, 下個星期有幾日仲會跌到11、12度(當然, 新界仲會再低幾度), 0係度呼籲各位朋友仔利用呢個星期六、日摷哂D冬天衫出0黎, 吹走陣臭丸味。下星期著多件衫, 飲多啖熱0野。又凍又病真係好淒涼0架, 小心, 小心。

聽歌（二）

趁住呢期比較得閒 「最近比較閒...比較閒...比較閒」, 繼續寫0下我0既聽歌歷程:

個人喜好類－－－
　
2.　黃凱芹　　　　
第一次帶佢0既錄音帶係「給您留念」精選，之後就一直有聽佢０既歌，總覺得聽阿Chris０既歌好舒服，最主要0既原因係佢唱歌非常投入，好有感情（只要你睇過佢唱Live個陶醉樣就會知道．．．．），而且用「才子」呢個字形容佢絕不為過，因為佢有好多歌都係自己作曲、或者作詞、甚至曲、詞一手包辦，仲連小說都寫埋(好似叫「繾綣塘西」) 我認為佢遣詞用字0既功力０係克勤之上。不過，佢０既歌唱事業亦都比克勤更難走，可能問題就在於「識唔識撈」，我覺得阿Chris好有藝術家脾氣，有好多事都唔會輕易妥協，大不了就唔唱果隻，結果佢0係95年0係飛圖出埋隻叫「紅塵傾心故事」0既精選碟之後就「淡出」（好彩最後確有0左唔係「退出」）樂壇，而且一淡就淡足七年，直到02年先恢復返佢0既幕前歌唱工作。好彩就我0係佢個復出演唱會所見，支持佢０既樂迷絕對冇因為佢隱居多年而熱情冷卻，當年對阿Chris０既熱情仍然係一撻即著。（最開心０既就係佢成個演唱會D歌我都識跟住唱，作為FANS好有滿足感）雖然佢而家唔算係最紅果班歌星，但係我都會一直支持佢。

推介0既Chris大碟--
a) 寶記時代 -- (首先一定要借呢個機會多謝我0係日研0既好朋友阿偉，全靠佢０係杏林0個陣DUB０左好多阿Chris0既歌比我，我先可以聽得返哂阿Chris0係寶記時代0既部歌)

短篇小說: 如果冇０左大碟封面０個個生硬到震0既甫士，呢隻碟就會更正。推介當然有伙頭智多星主題曲「無名小子」、仲有同克勤合唱０既「人間童話」、當然唔少得０係「告別校園時」出現前作為畢業驪歌代表作0既「青蔥歲月」、同埋「Hello Merry Christmas」，而全碟最後０個首「五月過後」意境一流，我成日一聽再聽０架。

你最喜歡的歌: 呢隻碟０既歌路好全面，基本上照顧到我任何時候0既心靈需要。抒情大HIT作固然有同周慧敏合唱0既「情未了」、而「壓抑」更加係我最鍾意一首Chris唱0既快歌。情歌推介「讓我痴迷愛一次」同埋「逝去的詩篇」。

c) 飛圖時代 --
平常心: 個人覺得呢隻碟係阿Chris最好聽、最值得收藏0既碟，首首歌都好好聽。「平常心」可能就係阿Chris0既心聲：　浮夢世界　如霧世態　愈看得真　感想愈怪　若要假嗎　天真的我不會　粉飾天賜的情懷．．．其他推介歌仲有「我還是我」、同飛圖天后梁雁翎合唱０既「哪裡的天空不下雨」、同張智霖合唱、講兩個鍾意埋同一個女仔０既男仔互串０既「笑話」同埋全碟我最鍾意０既「紅塵故事」

c) 環球時代 --
LONG TIME NO SEE: 阿Chris復出後0既第一隻碟，「難忘記」同埋「好久不見」都屬動聽之選

Chris為其他人創作0既作品--
　阿Chris除0左自己演繹自己０既作品之外，仲好無私咁作０左好多好歌比其他歌手唱，雖然呢D歌唔會首首都Plug上台，但係只要有一Plug就會很受歡迎，例如黎瑞恩「雨季不再來」、劉德華「一個人睡」，同埋阿Chris以「若愚」為筆名作俾Raidas，描寫暗戀痛苦０既「傾心」，都係水準之作。

真係好希望香港有多D好似阿Chris咁樣在曲詞方面都有一定功力０既創作歌手就好啦。

P.S. ０係寫呢篇文0個陣搵到一個好正好正０既黃凱芹網頁http://www.christopherwong.com，內容鉅細無遺，可見網主係個非常有Heart０既人，正！。


－－待續

無記無記．．．勞氣勞氣

0岩0岩先0係「隨時候命」欣賞過阿佘玩失憶，過0左3個鐘都冇0既「刑偵III」又話JESSIE失憶，連老公張大勇都唔認得．．．無記呀無記，兩套劇相隔成接近8年啦，點解D橋段仲咁雷同0架？唔通除0左失憶、兄弟為$或女反目、同婚外情就冇其他元素咩？
「刑偵III」D陣容雖然唔係太吸引我，但因為Melissa有份演出（呢套仲好似係佢第一套劇），我會盡量追睇落去．．．
廢嗡完畢，0訓覺

聽歌（一）

我細細個已經好鍾意聽歌（主要係國語同廣東歌），發展到今時今日，出街、搭車都會聽住歌，唔容許耳仔有一刻的寧靜。有時甚至會一路聽歌一路哼出聲，就算惹來途人報以奇怪目光都冇所謂。其實一個人鍾意聽咩歌，除０左個人喜好之外，都好受當時出現０係四周圍０既人，同埋當時潮流０既影響，我就係一個好例子：

個人喜好類－－－

　1.　李克勤　
　　　佢出道時我應該仍然個高小至初中０既豆０靚。記得第一隻擁有０既克勤專輯就係「Purple Dream」（果陣仲未有CD，係錄音帶時代）　鍾意佢０既原因有好多：

　　　　＋最重要當然係聲靚，震音又自然。好似有段時間佢被稱為「（聲線）零暇疵歌手」
　　　　＋形象都算健康。
　　　　＋有作曲作詞方面０既才華（最經典應該係「命運符號」）
　　　　＋歌路多變（有「一生不變」、有「舊歡如夢」、有「Victory」、近期０既「神州行」等）
　　　　＋佢一有種特殊才藝, 就係可以唱好靚好靚0既和音(其實唱和音一D都唔易, 真係要學0架, 張崇基、張崇德D和音都OK, 不過我始終喜歡聽克勤0既和音多D)

　　　總覺得克勤有一排唱歌唱到鑽左牛角尖，就係歌詞中０既每一個字都太刻意去雕琢，反而失去０左一種自然，而家當然已經冇哂呢D問題啦。仲有唔係幾聽得慣佢唱國語歌，好似硬係怪怪地咁．．．其實佢０既歌唱事業並唔係一帆風順，但０係事業低潮期佢好聰明咁去０左無記做主持，KEEP住曝光率，靜心等待發圍０既一刻，結果終於苦盡甘來，０係2002同2003年連續兩年奪得最受歡迎男歌手。

推介0既克勤大碟--
a) 寶記時代 --
命運符號: 幾乎首首歌都好聽, 推介「命運符號」、「告別憂鬱」、「誰願分手」、同黃凱芹合唱0既「絕對自我」
破曉時份: 「紅樓夢」當然最正啦(MTV仲有周慧敏0架), 仲有描寫九七前移民現象0既「後會有期」

b) 星光時代 --
希望 : 冇記錯0既話呢隻碟係周啟生監製, 聽起0黎感覺好特別、充滿周啟生0既陰邪feel。推介有「驚情400年」(非常吸血殭屍FEEL)
REBORN: 記得克勤個經典鬚根look嗎? 其中有一首「不要對我好」非常難唱, 我每次唱K挑戰都失敗, 唱到冇氣, 不能完成成首歌....(順帶一提, 「不要對我好」是改編自張信哲的「曾經愛過」, 廣東版國語版同樣動聽)

c) 藝能動音時代 --
尋最 : 推介「請你早睡早起」,如果你0既男/女朋友係一隻蒲精, 就點呢首歌比佢聽, 等佢反思0下啦; 重有勵志0既「不卑不亢」都值得一聽

d) 環球時代 --
Smart I.D. : 「六呎風雲」個人就覺得認真麻麻, 我反而會推介「0彭門」(講述男女朋友鬧交時控制EQ的重要性, 非常警世)、「你不會唱歌」(繼「三千零一夜」再向盧小姐致敬)、「那個應該是我」(歌詞普通,但相信有詞中相同經驗的人聽起來會有一番滋味) 同「世界末日的早上」(Melody和編曲正)

－－待續

SPL

最近同大哥、Smallsze去0左睇殺破狼。整體上觀感ok,打得夠哂勁秋,0岩哂我呢d唔鍾意用腦0既人。雖說呢套片因為太暴力而被定為三級片, 但其實從香港人0既角度睇都唔算認真好暴力。個人覺得最好睇有兩幕: 首先係第一個警察被阿JACK(吳京)以接近「八稚女」的手法用小太刀喪片後再割喉,一命嗚呼; 另一幕就係馬軍(甄子丹)和阿JACK的窄巷死鬥,兩人都有武功底子, 動作既快且狠,打得非常好睇。至於劇情方面就冇乜特別, 沒有值得談論的地方, 感覺上就係要營造一個又一個殺人、隻揪的場景。
其實呢套片我最想睇0既唔係甄子丹、亦唔係洪金寶（洪金寶做黑幫大佬個樣唔夠奸）同任達華, 而係吳京。總覺得華籍武打新星要令人留下深刻印象通常就係做奸角。(李連杰個樣忠到接近有D戇居,0係轟天砲4都要做冷面殺手....), 吳京來頭其實好勁, 細細個就習武, 連續幾年攞過甚麼甚麼武術冠軍, 更加曾經係國家武術隊的成員,個人非常期待佢0既發圍。
講開甄子丹, 除0左佢套「精武門」之外, 有冇人知道佢早期有齣戲叫「情逢敵手」?我有一次由大陸搭巴士返沙田果陣0係車度睇過, 非常搞野。 搞野不在於劇情, 而係甄子丹當時０個個樣同表情真係.... 如果有人行街見到呢隻碟，唔該幫我買隻。（廿蚊應該實有找）

殺破狼官方網頁： http://www.shapolangthemovie.com/
其中一個介紹吳京0既網頁: http://wujing.sky263.com/gonggao/gonggao.htm

test

測試